Otija bi se ošervat i reč rič-dvi na ovo pasano vrime ča je odiza mene.
Evo sjutra je čipo 5 godin ča san ovod, ono ka' ajmo reč, otvorija butigu di svak more ulist i izač kako ga je vo'ja. More mukte vazest i pofalit ono ča mu paše a more i borami ispjucat sve sredon. Ja nisan puno obadava nikoga jerbo nisan peškaruša ni piciškandal pa me ni bila vo'ja za karat se ovin puten a finalmente uvik jema svita ča mu uvik ništo ne paše, ča ga češe, ni mu po vo'ji ili je đelozast.
Nima toga na ovoj zema'jskoj baloti ko more sviman lagodit i ugodit. Taki se još nije rodija.
Inšoma izdura san skupa su Vaman ovi pet godin a one su u je'nu ruku protrkale u sekund a u drugu otegle se ka črivo.
Ovod san trevija pusto svita, su puno o' nji san se i vidija a postali smo borami i kumpanji...
Nebi sa' tija nabrajat i spominjat imena jerbo me je straj da ču zaudobit kojega i ne bi tija da se oti čutidu meknuti su bande...
Pripoznat če se oni sami...
Baš zara nji' mi je drago ča je ova butiga bila porto-franko za svakega čovika dobre vo'je.
Su druge bande niki moji kumpanji su se odavna štufali (neču grišit dušu: more bit da su jemali prišnijega posla) pa su fermali notavat. Nima veze neka in je su sričon...
Meni je bilo drago i gušta san povirit ko' nji' jerbo bi uvik tamo naša pametni' a puno puta i tepli besid koje bi me u niku ruku tiščale i davale mi forcu turat naprid i izdurat sve triske ča i' ovi život dili leva-leva.
Zara tega in se zafalijen o' srca.
Je, vaja' bit pošten pa reč da je život ka' paninbrod, juva udrobjena su kruvon, pa digod ka' čorav agvantaš praznu zlicu a borami digod i zlicu su lipin bokunon kruva. More se komodno reč da je život ka i feta one domače vlaške pancete su redon crvenoga pa onda bilega. Jedno prez drugega nevaja iako puno nij' tura su bande oni red bilega.
U otoj životnoj švidi izgubi obišni čovik puno zalogaji i nikad ne projde lišo jerbo triba proč puno vrimen da mu postane kjaro kako jema judi su obrazon ka šjola o' poplata koji čedu prez pardona zdupit ne su zlicon nego su kacjolon u pjat ka' se drugi neškaju, i ne bi tili ispast grezuni.
Nima veze neka in je uslast, jerbo i su onin bokuničima ča su mu ostanu obišan čovik je sritan i prizadovojan.
On če i o' bokuniči znat učinit feštu...
Naravski da triba vrimena za postat meštar tega ali ka' se zapne i postiva sve na svoje misto nima straja...
Jušto bi tija zafalit i onin judima ča vodidu ovi posal i ča su me toko vrimena trpili i tiščali na nji'ovon, kako oni zovedu, «cool listi». Pari mi se da su omar falili jerbo ja ne miritan bit tamo di su me oni stivali a i ne unfišajen nisan šufištik i ne gren kolo-nakolo su noson u ariji. Uvik san notava oni ča mi je bilo oti momenat na justiman, u čiverici oli ono čega san se spominja.
Za'nje vrime ne notajen ništa jerbo je došlo tak'o vrime ka' Bog otac ne more iz čovika izgulit njanci klištiman bilo ča iz njega...
More samo otin klištiman mavat simo tamo neče ništa čapat jerbo dok se čovik ne razvanta jema samo ariju u možđaniman. Njanke personjo. Siguro...
Jopeta san zabuca di nisan tija pa se vračan onin judima odozgar i lipo i' molin da me maknedu su one liste, oslobodidu me i na moje misto stavidu koga ko' očedu...
Jema krcato mladega i pametnega svita koji jemadu puno lipi' stvari za reč...a i miritadu...
Ja san tamašan, požmaren ka stara pantagana, zgobavjen, za udunit se, lapan kojega je vrime protrkalo i smečilo u štracu koja je zanimjiva samo njegovin kumpanjiman.
Fala Bogu da me i oni trpidu...
More bit da takega čovika nanova užgedu... more se dogodit da ga dikod i trevite, da nabasate na nj' ...njemu če biti puno drago...
Do tega vrimena...stojte mi dobro i sve najboje Van želin...
e...
|
